Midnight Masala

B017 dated at Tadepalligudem the 12.02.T21

రాత్రి 1.40 అయింది. ఎంత ప్రయత్నించినా నిద్ర పట్టట్లేదు. తలనొప్పి వస్తుంది. భయాందోళనలు ఆలోచనలై మెదడుని తొలిచి వేస్తుంటే అవి ముళ్ళై కునుకు లేని కళ్ళలో మొలుచుకొస్తుంటే పగలు రాత్రి అని తేడా ఏం ఉంటుంది. 

ప్రతి మనిషికి తనకి ఉన్న ఒత్తిళ్లకి ప్రత్యామ్నాయంగా ఏదో ఒకటి ఉంటుంది. Stress buster అంటారే అది. ఉన్న బాధల్ని మర్చిపోవటానికి లేదా మార్చుకోవటానికి ఎదో ఒక Alternative way ఉంటుంది. నాకు ఇంత రాత్రిలో అలాంటివి ఏమి కుదరవు. అందరూ నిద్రపోయిన టైమ్. అందుకే ఇలా ఇక్కడ విరుచుకుపడాల్సి వస్తుంది. నా స్టేటస్ లు, పోస్ట్ లు చదివిన చాలామంది లో కొంతమంది అడిగిన common questions ఏంటి అంటే, అసలు నీకున్న బాధలు ఏంటి, ఉంటే మాత్రం ఇలా అందరికి చెప్పి ఏం బావుకుంటావ్ సింపతి కోసమా అని. నేను ఎవరిని పిలిచి నా కష్టాలు చెప్పుకోవట్లేదు. ఎందుకంటే అవి ఎవరూ తీర్చి, ఆర్చలేనివి. అలా అని దాచుకుని భరించేస్తూ ఉంటే నేను చాలా ఆనందంగా ఉన్నానేమో అనే భ్రమ అందరిలో కలిగే అవకాశం నేను వారికి ఊరికే ఎందుకివ్వాలి.

ఇలాగే ఒక స్నేహితుడు నన్ను అడిగాడు, అసలు ఇంత పిచ్చ హాపీగా నేను ఎలా ఉండగలను అని. నాకు పిచ్చ నవ్వు వచ్చింది అపుడు. నేను బాధ పడినట్టు గాని ఆనందంగా ఉన్నట్టు గాని ఎప్పుడూ బయటకి కావాలని ఉన్నది లేనట్టు, లేనిది ఉన్నట్టు చూపించాలి అనుకోలేదు. నాకు తెలిసి అలా చెయ్యలేదు కూడా. అయినా ఆనందాలు అనుభవించాలి, బాధలు భరించాలి, అవన్నీ అందరికీ పంచాలి. ఇదే కదా జీవితం. కొన్ని బాధలకు కొనసాగింపు తప్ప మినహాయింపు ఉండదు. అంటే వాటికి సొల్యూషన్ ఉండదు కానీ వాల్యుయేషన్ ఉంటుంది.

మనకి ఉన్న సమస్యను బట్టి బాధని అంచనా వెయ్యలేం. ఎందుకంటే ఎన్నో విషయాల్లో నా కంటే కలిగి ఉన్న వాళ్లలో కొంతమంది నా బాధలకి వాళ్ల బాధల్ని జత చేసుకుని చెప్తూ నన్ను ఓదార్చే ప్రయత్నం చేస్తూ ఉంటారు. వాళ్ళు చెప్పేది ఒక్కటే. సంతృప్తి అనేది వాళ్ళు పొందలేకపోతున్నారు. నిజానికి మనం తీసుకునే కొన్ని బాధ్యతలే, మోసుకునే కొన్ని బరువులే బాధల్ని మిగులుస్తాయి. వాటికి కారణాలు మనం తప్పుగా తీసుకున్న నిర్ణయాలే. 

మొయ్యలేక వదిలేస్తే బలహీనుడు అంటారు, పోనీ పారిపోతే పిరికివాడు అంటారు. ఆలోచన అనేది ఏదైనా మొదలెట్టే ముందే ఉండాలి. మొదలెట్టాక ఆలోచించే అవసరం వచ్చింది అంటే మొదలెట్టడమే తప్పు అని అర్ధం. ఇతరుల మీద మోపలేని, సొంతంగా ఓపలేని, అలాగని ఆపలేని పనిని గురించి ఇలా వ్యాసాలు రాసుకోవడం తప్ప ఏమీ చేయలేము. ఇంకా తలనొప్పి తగ్గలేదు. టైమ్ 2.26 అయింది, నిద్ర కూడా రావట్లేదు. అంటే నేను రాయాల్సింది ఇంకా ఏదో ఉంది కాని మానసిక సహకారం లేదు.

-ecKce